Dals 12 fin ils 15 d’october 2026 ha lieu il Geneva Peace Forum en il Center internaziunal da conferenzas a Genevra. Sut il motto «Choose Peace» reunescha l’occurrenza represchentants da la politica, d’organisaziuns internaziunalas, da la societad civila e da la scienza. Il Departament federal d’affars exteriurs sa participescha sco partenari strategic.
Il secretari da stadi dal DFAE Alexandre Fasel discurra a l’avertura. Ils 12 d’october discuta el cun il president da Sierra Leone Julius Maada Bio, il minister da stadi dal Katar Mohamed Al-Khulaifi ed ulteriurs experts davart l’impurtanza da normas per la mediaziun da pasch. Il forum cumbinescha uschia discurs politics cun metodas praticas da la promoziun civila da la pasch.
In punct central è la seria «Mediation in Focus», a la quala la Divisiun Pasch e dretgs umans dal DFAE collavura. Set occurrenzas tractan tranter auter il dretg internaziunal, process da pasch inclusivs e la realisaziun a lunga vista da cunvegnas da pasch. Ulteriuras rundas sa deditgeschan a dunnas en process da pasch, a la diplomazia umanitara ed a la prevenziun da conflicts.
Il nov forum cuntinuescha en in’autra furma l’istorgia da dudesch onns da la Geneva Peace Week. Organisà vegn el da la fundaziun Geneva Peacebuilding Platform ensemen cun in consorzi d’instituziuns genevrinas e partenaris internaziunals, cun il sustegn da la Confederaziun, dal chantun e da la citad da Genevra. La participaziun al lieu u online è gratuita, pretenda dentant ina registraziun.