Ils partenaris dal project han annunzià per glindesdi, ils 28 da settember, il cumenzament dal transport public da passagiers cun autos automatics en la val Furttal en il chantun da Turitg. L’offerta dal project da pilot «iamo» duai esser disponibla l’emprim mintga di da las 13.00 fin las 17.00. Ins po reservar cun in’app speziala. Tenor ils partenaris pon passagiers utilisar per l’emprima giada en Svizra in’offerta da quest gener.
Trais vehichels duain servir bunamain 100 fermadas fixas a Boppelsen, Dänikon, Hüttikon ed Otelfingen. En mintga auto pon ir fin a trais passagiers. Ils autos duain circular sin vias normalas en il modus automatisa. Sin il sez dal manischunz sesa vinavant ina persuna da segirezza che po intervegnir, sche necessari; il sez davant sper il manischunz resta liber.
In viadi custa 4.70 francs sco pretsch da basa, plus 38 raps per kilometer. L’abunament general ed auters abunaments dal traffic public na valan betg per quest project da pilot. Giuvens a partir da 12 onns pon viagiar persuls; uffants pli giuvens dovran ina persuna creschida che als accumpogna. L’offerta è limitada als viadis entaifer la zona da manaschi.
Swiss Transit Lab, ils chantuns da Turitg ed Argovia sco era las Viafiers federalas vulan examinar cun il project co vehichels automatics pon cumplettar bus e viafier, per exempel sin il viadi a la staziun u en regiuns cun pauca populaziun. Avant il cumenzament annunzià èn las rutas vegnidas cartografiadas. Dapi l’autorisaziun da l’Uffizi federal da vias da november 2025 eran ils autos gia stads en il traffic regular per tests, adina cun ina persuna da segirezza.
Pli tard èn previs er pitschens bus senza ina persuna da segirezza a bord. Per quai dovra il project ina permissiun separada da l’Uffizi federal da vias. Ils autos duain dentant vegnir accumpagnads d’ina persuna da segirezza durant l’entir manaschi da passagiers actual.